फागुन १०,गैँडाकोट (प्रेम क्षेत्री)। गण्डकी प्रदेश खेलकूद परिषद्को आयोजना तथा जिल्ला खेलकुद विकास समिति नवलपुरको व्यवस्थापनमा हुने राष्ट्रपति रनिङ शिल्ड प्रतियोगिताको सम्पूर्ण तयारी पूरा भएको छ ।
गैँडाकोटमा हुने तेक्वान्दो खेलको सम्पूर्ण तयारी पुरा भएको गैँडाकोट नगर खेलकुद विकास समितिका उपाध्यक्ष लक्ष्मण कार्कीले जानकारी दिनुभयो । प्रदेशका ९ वटा जिल्लाका १०८ जना खेलाडीले प्रतियोगितामा सहभागिता जनाउने उहाँले जानकारी दिनुभयो ।
११, १२ र १३ गते जिल्लाका अन्य पालिकाहरुमा समेत विभिन्न खेलमा प्रतिस्पर्धा हुँदैछ । देवचुली नगरपालिकामा भलिबल र कबड्डी, कावासोती नगरपालिकामा एथ्लेटिक्स र उसु, मध्यविन्दु नगरपालिकामा सितेरियो कराँतेका खेल हुँदैछन् । प्रतियोगिताका लागि प्रदेशका विभिन्न जिल्लाबाट खेलाडी आइसकेका छन् ।
गण्डकी प्रदेश खेलकुद परिषद्का सदस्य सचिव श्रीधर शर्माले नवलपुरको पर्यटन विकासलाई खेल मार्फतबाट अगाडि बढाउन यी प्रतियोगिता नवलपुरमा आयोजना गरिएको बताउनुभयो ।
विद्यालयस्तरबाट नै खेलाडी उत्पादन गर्ने र उनीहरुको प्रतिभालाई राष्ट्रिय तथा अन्तर्राष्ट्रियस्तरसम्म उजागर गर्ने उद्देश्यका साथ स्थानीय, प्रदेश र राष्ट्रिय तहको प्रतियोगिता आयोजना गरिएको हो ।
