काठमाडौँ । काठमाण्डौ उपत्यकासहित देशका धेरै ठाउँमा रातभर पानी परेको छ । अरु ठाउँको तुलनामा पाल्पा र कपिलवस्तुमा धेरै पानी परेको छ ।
लुम्बिनी प्रदेशसँगै गण्डकी प्रदेशका केही ठाउँमा ठूलो पानी परेको छ । कपिलवस्तु, गुल्मी, तनहुँ, कास्की, स्याङ्जा, पाल्पा र आसपासका क्षेत्रका खोलानालामा जलसतह बढ्दो क्रममा रहे पनि हाल अवस्था सामान्य रहेको बाढी पूर्वानुमान महाशाखाले जनाएको छ ।
कर्णाली प्रदेशका हिमाली भेगबाहेक अरु सबै ठाउँमा हल्कादेखि मध्यम वर्षा भएको छ । मौसम पूर्वानुमान महाशाखाका अनुसार आजदेखि पानी पर्नेक्रम अझै बढ्नेछ । केही ठाउँमा मुसलधारे र आरीघोप्टे वर्षाको सम्भावना छ ।
आज कोशी, बागमती र गण्डकी प्रदेशको थोरै ठाउँमा तथा मधेश र लुम्बिनी प्रदेशको एक/दुई ठाउँमा मुसलधारे वर्षाको सम्भावना छ । यस्तै कोशी र बागमती प्रदेशको पहाडका एक/दुई ठाउँमा पनि मुसलधारे वर्षाको सम्भावना रहेको महाशाखाले जनाएको छ ।
