जेठ १५ काठमाडौँ । मंगलवार गणतन्त्र दिवसको अवसरमा नेपालसहित विदेशमा पनि विभिन्न कार्यक्रम गरी गणतन्त्र दिवस मनाइँदैछ । प्रधानमन्त्री पुष्पकमल दाहाल प्रचण्डको अध्यक्षताको गठित गणतन्त्र मूल समारोह समितिले देशैभरि राज्यको तहबाट विभिन्न कार्यक्रम आयोजना हुँदैछ । मुख्यगरी, सैनिक मञ्च, टुँडिखेलमा सरकारले आयोजना गर्ने विशेष समारोहका बिचमा मूल कार्यक्रम हुनेछ । जुन कार्यक्रममा नेपाली सेना विशेष परेडको आयोजना गर्नेछ ।
यसैगरी, गणतन्त्र दिवसको अवसरमा सरकारी कार्यालय, राजनीतिक दल, राजनीतिक दलका भातृ संगठन, विभिन्न संघ संस्थाहरूले पनि आ-आफ्ना किसिमले विभिन्न कार्यक्रमको आयोजना गर्ने गर्दछन् ।
२०६२/०६३ को दोस्रो जनआन्दोलन सफल भएपछि मुलुक क्रमशः गणतन्त्र उन्मुख हुन पुगेको थियो । २४० बर्से जहानियाँ शासनको अन्त्य गर्दै २०६५ जेठ १५ गते बसेको संविधानसभाको पहिलो बैठकमार्फत मुलुक गणतन्त्रमा प्रवेश गरेको घोषणा गरिएको थियो । सो घोषणासँगै नेपाल गणतन्त्रात्मक मूलक भएको अवसरमा हरेक वर्ष जेठ १५ मा गणतन्त्र दिवस मनाइँदै आएको छ । यस अवसरमा सरकारले मंगलबार सार्वजनिक बिदासमेत दिइएको छ ।
