श्रावण १८, गैँडाकोट। नवलपुरको गैँडाकोट-१२ स्थित मुकुन्दसेन बहुमुखी कलेजको क्याम्पस प्रमुखमा ईश्वरीप्रसाद चापागाईं नियुक्त हुनु भएको छ । कलेज सञ्चालक समितिले उहालाई कलेज प्रमुखको पूर्ण जिम्मेवारी प्रदान गरेको हो।
लामो समयदेखि शैक्षिक प्रशासन, व्यवस्थापन र अध्यापनमा सक्रिय चापागाईंले २०६७ सालदेखि सोही कलेजमा शिक्षण कार्य सुरु गर्नुभएको थियो। यसअघि उहाँ २०७६ सालदेखि सहायक क्याम्पस प्रमुखका रूपमा जिम्मेवारी सम्हाल्दै आउनुभएको थियो । शिक्षा र सञ्चार क्षेत्रको लामो अनुभव चापागाईंसँग छ। यसका साथै उहाले एसपीएम कलेज लगायत अन्य शैक्षिक संस्थाहरूमा समेत नेतृत्वदायी जिम्मेवारी सम्हाल्दै आउनुभएको थियो ।
नयाँ क्याम्पस प्रमुखको नियुक्तिसँगै कलेजको शैक्षिक गुणस्तर, अनुसन्धान, विद्यार्थी-केन्द्रित कार्यक्रम तथा संस्थागत विकासले थप गति लिने विश्वास कलेज परिवारले गरेको छ। चापागाईंको नेतृत्वले कलेजलाई शैक्षिक उत्कृष्टता, सुशासन र नवप्रवर्तनतर्फ अगाडि बढाउने अपेक्षा गरिएको छ। गैँडाकोट-१२ मा अवस्थित मुकुन्दसेन बहुमुखी कलेज नवलपुर जिल्लाकै प्रतिष्ठित सामुदायिक उच्च शैक्षिक संस्थाहरूमध्ये एक हो। कलेजले विज्ञान, व्यवस्थापन, शिक्षाशास्त्रलगायतका विभिन्न सङ्कायमा गुणस्तरीय शिक्षा प्रदान गर्दै दक्ष जनशक्ति उत्पादनमा योगदान पुर्याउँदै आएको छ।
