नवलपुर समाज जापान द्धारा बिरामी समिता भट्टराईलाई आर्थिक सहयोग

 फागुन २ गैंडाकोट । नवलपुर समाज जापानले गैंडाकोट ४ मा एक कार्यक्रमका बीच बिरामी समिता भट्टराईलाई आर्थिक सहयोग गरेको छ ।

देवचुली नगरपालिका वडा नं. १० स्थायी ठेगाना भई हाल गैंडाकोट ४ माईतमा बस्दै आउनुभएका ३८ वर्षिय समिता जटिल रोग Myasthenia gravis बाट पिडित हुनुहुन्छ । औपचारिक कार्यक्रमका बीच गैडाकोट वडा नं. ४ का अध्यक्ष तेजप्रसाद घिमिरेको रोहबरमा २ लाख रुपैया नगद सहयोग गरिएको हो । सहयोग रकम समिता भट्टराईको आमाको हातमा हस्तान्तरण गरिएको हो ।

समिता भट्टराई बचाउ अभियानलाई विशेष गरि जापान बस्दै आउनु भएकी नवलपुर समाज जापानको सल्लाहकार गैंडाकोट १ निवासी चन्द्रकला सापकोटा लक्ष्मीको संयोजकत्वमा सहयोग संकलन गरिएको हो । यस अभियानका संयोजक समेत रहनुभएकी उहाँले सहयोग रकम उठ्ने कार्य अझै पनि जारी रहेको बताएकी छिन् ।

नवलपुर समाज जापान विशेष गरि नवलपुर क्षेत्रका जापानमा रहि काम गर्दै आएका नेपालीहरुको समाज हो । जसले यस क्षेत्रमा विभिन्न सहयोग कार्यक्रमहरु गर्दै आईरहेको छ । आर्थिक सहयोग संकलनमा स्थानीय जनकल्यान महिला समूहको पनि उत्तिकै भूमिका रहेको छ । सबै कुराहरुको सहजीकरण गरि समूहले प्रत्यक्ष रुपमा सहयोग गरेको हो ।

आर्थिक सहयोग वितरण कार्यक्रममा समूहका अध्यक्ष हिरा थापा एवं समूहका दिदिबहिनीहरुको विशेष उपस्थिती रहेको थियो । कार्यक्रम समूहका सहसचिव रिता पौडेल तिमिल्सेनाले सहजीकरण गर्नुभएको थियो ।

काठमाण्डौंको टिचिङ्ग हस्पिटलमा उपचार गराउँदै आउनुभएका समिताको ५ महिनाको एक छोरी समेत रहेका छन् । श्रीमान रोजगारीको शिलशिलामा दुबईमा करिब १३ वर्ष जेल परेपछि केहि वर्ष अघि मात्रै नेपाल फर्केका छन् । उनको दुबै आँखा निकै नै कमजोर रहेका कारण राम्ररी देख्न समेत सक्दैनन् । घरको आर्थिक अवस्था पनि नाजुक, श्रीमानको अवस्था पनि त्यस्तै र एक छोरी भएकी समिताले सबैसँग सहयोगको अपिल गरेकी छिन् । उनलाई सहयोग गर्न चाहनेले ग्लोबल आई एमई बैंकको तारा अधिकारी भण्डारीको नाममा रहेको खाता नं. एम १०७०१०००५६५५ मा जम्मा गरि उनलाई सहयोग गर्न सकिने उनको परिवारले जनाएको छ ।