असोज २, काठमाडौँ । आईसीसी विश्वकप लिग २ खेल्न क्यानडामा रहेको नेपाली टोली आज ओमानसँग भीड्दैछ ।
खेल नेपाली समय अनुसार किंग सिटी मैदानमा राति पौने ९ बजेदेखि सुरु हुनेछ । त्रिकोणात्मक ओडीआई सिरिजअन्तर्गत पहिलो खेलमा नेपाल आयोजक क्यानडासँग फराकिलो अन्तरले पराजित भएको थियो ।
लिग २ मा नेपालले निकै कमजोर शुरुवात गरेको छ । ७ महिनाअघि घरेलु मैदानमा भएको त्रिकोणात्मक सिरिमा नेपालले ३ खेल हारेको थियो । नामिबियासँग २ र नेदरल्याण्ड्ससँग एक खेलमा नेपाल पराजित भएको थियो ।
क्यानडा भ्रमणमा पनि हारबाटै शुरु भएको छ । नेपाल शीर्ष स्थानमा रहँदै नम्बर वान एशोसिएट राष्ट बन्न देशबाहिरका खेल नेपालले जित्नै पर्नेछ । तर त्यस्तो हुन सकेको छैन ।
नेपाल लिग २ का पाँच खेलमध्ये ४ मा पराजित हुँदा २ अंकका साथ सातौं स्थानमा छ । ओमान चार खेलबाट ३ अंक जोडेर नेपालभन्दा एक स्थान माथि छ । पछिल्ला पाँच खेलमा नेपाल ३ र ओमान २ खेलमा विजयी भएका छन् ।
यो सिरिज अन्तर्गत नेपालले क्यानडासँग अर्को खेल ६ गते र ओमानसँग ८ गते खेल्नेछ । ओडीआई सिरिजपछि नेपालले क्यानडा र ओमानसँगै टी-२० सिरिज पनि खेल्नेछ । क्यानडापछि नेपाल लिग २ का लागि अमेरिका जानेछ । त्यहाँ अमेरिका, नेपाल र स्कटल्यान्डबीच त्रिकोणात्मक र टी-२० आई दुवै सिरिज हुनेछ ।
