साउन १७ ,गैंडाकोट। हिन्दु नारीहरूको महान पर्व हरितालिका तीजका अवसरमा गैंडाकोटमा रहेको रेडियो संकेत ९३ मेगाहर्जले बृहत खुल्ला तीज गीत प्रतियोगिता गर्ने भएको छ ।
तीज पर्वले समाजलाई सकारात्मक सन्देश दिन सकोस् भन्ने अभिप्रायले प्रतियोगिताको आयोजना गरिएको रेडियोका स्टेसन म्यानेजर सुजन अधिकारीले बताए । कला संस्कृति तथा मौलिक पर्वलाई सामाजिक सांस्कृतिक परम्परा जोगाई राख्नका लागि सो प्रतियोगिता गर्न लागिएको उनले बताए ।
कार्यक्रममा सहभागी हुनका लागि परम्परा झल्किने पोशाक र समसामयिक विषयमा लेखिएका शब्दहरू ५ देखि ७ जना महिला समूहले प्रस्तुत गर्नेछन् । आफ्नो प्रस्तुति राख्नका लागि सात मिनेटदेखि १० मिनेट समय छुट्याइएको कार्यक्रम भदौ १५ गते शनिबार होटल द नारायणी गैंडाकोटमा आयोजना हुनेछ ।
प्रतियोगितामा प्रथम पुरस्कार रु १५ हजार, द्वितीय पुरस्कार रु १० हजार ,तृतीय पुरस्कार रु ५ हजार र सान्त्वना पुरस्कार रु ३ हजार रहेको छ । समूह दर्ता गर्ने अन्तिम मिति २०८१ भाद्र १२ गते सम्म रहेको आयोजकले जानकारि दिएको छ ।