चैत २१ ,गैँडाकोट । धार्मिक सेवा समिति मौलाकालिका मन्दिर गैंडाकोटको १४औं अधिवेशनबाट अध्यक्ष पदमा खगेन्द्रदास कँडेल विजयी भएका छन्। नेपाल राष्ट्रिय समशेर आदर्श माध्यमिक विद्यालयमा सम्पन्न निर्वाचनमार्फत कंडेल अध्यक्षमा निर्वाचित भएका हुन्। उनले आफ्ना प्रतिस्पर्धी काशीनाथ कंडेललाई पराजित गर्दै नेतृत्व सम्हाल्ने अवसर पाएका हुन्। निर्वाचन परिणामअनुसार खगेन्द्रदास कंडेलले ४५३ मत प्राप्त गर्दा काशीनाथ कंडेलले २२१ मत प्राप्त गरेका छन्।
निर्वाचनमा अन्य पदहरूमा पनि रोचक प्रतिस्पर्धा देखिएको थियो। वरिष्ठ उपाध्यक्ष पदमा सुवनप्रसाद ढकाल विजयी भए। उनले आफ्ना निकटतम प्रतिद्वन्द्वी केशवप्रसाद सापकोटालाई ३३४ मतको अन्तरले पराजित गरेका हुन्। त्यसैगरी, उपाध्यक्ष पदमा नेत्रप्रसाद अधिकारी (भरत) विजयी भएका छन्। उनले डिल्लीप्रसाद पाठकलाई ३१० मतले पराजित गरे। अधिकारीले कुल ४८० मत प्राप्त गर्दा पाठकले १७० मत ल्याएका थिए।
गुरुकुल व्यवस्थापन समितितर्फ पनि प्रतिस्पर्धात्मक निर्वाचन भएको थियो। उक्त समितिको सदस्यमा शोभानाथ गौडेल विजयी भए। उनले ३५१ मत प्राप्त गर्दा उनका प्रतिस्पर्धी चुडामणि शर्माले १९९ मत प्राप्त गरेका थिए। निर्वाचन समितिका अनुसार बाँकी रहेका अन्य पदहरू भने यसअघि नै सर्वसम्मतिका आधारमा चयन गरिएको थियो। यसले संस्थाभित्र सहमति र सहकार्यको वातावरण रहेको संकेत गरेको छ।
शनिबार सम्पन्न निर्वाचनमा कुल ६९९ मतदाताले आफ्नो मताधिकार प्रयोग गरेका थिए। उल्लेख्य सहभागितासहित सम्पन्न भएको यो निर्वाचनले धार्मिक संस्थाभित्र पनि लोकतान्त्रिक अभ्यास सुदृढ हुँदै गएको देखाएको छ।
