काठमाडौं। नेपाली चलचित्र ‘ज्वाइँ साब’को टिजर सार्वजनिक भएको छ।
दसैँको अवसरमा असोज २४ गतेदेखि रिलिज हुने तयारीमा रहेको ज्वाइँ साब’को टिजरमा मुख्य कलाकार जितु नेपाल र नायिका नीति शाहको रोचक जोडीलाई देखाइएको छ।
बुधवार रिलिज गरिएको चलचित्रको टिजरले निकै राम्रो प्रतिक्रिया पाइरहेको छ । साथै निर्देशक निरौलाको निर्देशनको पनि चर्चा भएको छ । यो चलचित्रको नाम घोषणा भएदेखी नै चर्चामा रहेको थियो ।
टिजरमा जितु नेपाललाई एक हास्यपूर्ण तरिकामा प्रस्तुत गरिएको छ भने नीति शाहलाई हात्तीमाथि चढेर बेहुलीको भेषमा सजिएको देखाइएको छ, जसले चलचित्रको रोमान्टिक र मनोरञ्जनात्मक पक्षलाई झल्काउँछ।
‘ज्वाइँ साब’को निर्देशन बसन्त निरौलाले गरेका छन्। यसमा मिनादेवी खड्का, सौगात पण्डित, र पदमलाल तामाङको लगानी रहेको छ। कार्यकारी निर्माता विजय बस्याल हुन् भने शङ्कर धितालले लेखन, सविन अधिकारीले कथा, श्याम तामाङले छायाङ्कन, र सञ्जय थापाले एक्सन निर्देशन गरेका छन्। सङ्गीत अर्जुन पोखरेल र महेश ताम्राकारले दिएका छन्।
चलचित्रमा जितु नेपाल र नीति शाहसँगै बुद्धि तामाङ, रमेश बुढाथोकी, शिशिर वाङ्देल, प्रकाश घिमिरे, निमा पाण्डे, हिमेश पन्त, शिवहरि वैरागी, राजेन्द्र नेपाली, कविता आले, शिवु पाण्डे, र इशान राउत लगायतका कलाकारहरूको अभिनय रहेको छ।