गैँडाकोट । नेपालको कृषि संस्कृतिसँग जोडिएको असार १५ अर्थात् राष्ट्रिय धान दिवस धान खेतीको महत्व उजागर गर्दै किसानप्रति सम्मान व्यक्त गर्ने दिनका रूपमा मनाइन्छ । विक्रम सम्बत् २०६१ मङ्सिर २९ गतेको मन्त्रिपरिषद् निर्णयअनुसार २०६२ साल असार १५ गतेदेखि राष्ट्रिय धान दिवस मनाउन थालिएको हो । यस वर्ष “जलवायुमैत्री प्रविधिः धानमा आत्मनिर्भरता र समृद्धि” भन्ने नाराका साथ देशभर विभिन्न कार्यक्रम गरि धान दिवश मनाइएको छ ।
२३ औँ राष्ट्रिय धान दिवस तथा रोपाईँ महोत्सव २०८३ का अवसरमा गैँडाकोट नगरपालिका–१२ मालपुर (भेडाबारी) मा हर्षोल्लासका साथ धान रोपाइँ महोत्सव मनाइएको छ ।
आत्मनिर्भर कृषक समूह गैँडाकोट–१२ को आयोजनामा सोमबार आयोजित कार्यक्रममा जनप्रतिनिधि, कर्मचारी, कृषक तथा स्थानीयवासी पञ्चेबाजाको तालमा रमाउँदै सामूहिक रूपमा धान रोपाइँमा सहभागी भएका थिए । धान जोन क्षेत्रका किसानहरूले विशेष उत्साहका साथ रोपाइँ गरेका थिए भने थारु समुदायका कृषकहरूले आफ्नै असारे भाकामा गीत गाउँदै परम्परागत शैलीमा धान रोपेर कार्यक्रमलाई थप आकर्षक बनाएका थिए ।
कार्यक्रमका क्रममा हिलोमा दौडेर हाँस छोप्ने प्रतियोगितासमेत आयोजना गरिएको थियो, जसले सहभागीहरूलाई मनोरञ्जनका साथै असार १५ को मौलिक संस्कृति झल्काएको थियो ।
गैँडाकोट नगरपालिकाका नगरप्रमुख मदनभक्त अधिकारीले धान उत्पादन वृद्धि, आधुनिक कृषि प्रविधिको विस्तार र कृषि उपजको बजारीकरणमा नगरपालिका सधैँ किसानसँग सहकार्य गरेर अघि बढ्ने बताउनुभयो । कृषकलाई प्रोत्साहन गर्ने कार्यक्रमलाई निरन्तरता दिँदै कृषि क्षेत्रमार्फत गैँडाकोटलाई थप सक्षम र आत्मनिर्भर बनाइने उहाँको भनाइ थियो ।
कार्यक्रममा वडा नम्बर–१२ का वडाध्यक्ष चक्रपाणी कँडेलले स्वागत मन्तव्य व्यक्त गर्दै कृषकलाई प्रोत्साहन गर्ने कार्यक्रम सञ्चालनमा वडा कार्यालय प्रतिबद्ध रहेको र कृषिनै गैँडाकोटको समृद्धिको आधार भएको बताउनुभयो ।
नवलपुरका प्रमुख जिल्ला अधिकारी जगदीश्वर उपाध्यायले गैँडाकोट धान उत्पादनमा आत्मनिर्भर बन्दै निर्यात गर्न सक्ने सम्भावना भएको उल्लेख गर्दै कृषि उत्पादन वृद्धि र किसानलाई आवश्यक सहजीकरणका लागि प्रशासनबाट सहयोग रहने बताउनुभयो ।
आत्मनिर्भर कृषक समूहकी अध्यक्ष जितकुमारी थनेतको अध्यक्षतामा सम्पन्न कार्यक्रममा गैँडाकोट नगरपालिका कृषि विकास शाखा, कृषि विकास कार्यालय कावासोती तथा राष्ट्रिय कृषि आधुनिकीकरण कार्यक्रम, कार्यान्वयन एकाइ, कावासोतीको आर्थिक सहयोग रहेको थियो ।
कार्यक्रमको सहजीकरण गैँडाकोट नगरपालिका कृषि शाखा प्रमुख राजु शर्माले गर्नुभएको थियो । उहाँले जलवायु परिवर्तनको असरलाई मध्यनजर गर्दै जलवायु अनुकूल खेती प्रणाली अपनाउनुपर्नेमा जोड दिनुभयो ।
राष्ट्रिय धान दिवस तथा रोपाइँ महोत्सवका अवसरमा गैँडाकोटका उपप्रमुख शान्ति कोइराला, नगरकार्यपालिका सदस्य, जनप्रतिनिधि, कर्मचारी तथा कृषकहरूले खेतमै सामूहिक रूपमा धान रोप्दै दही–चिउरा खाएर पर्व मनाएका थिए । नगरका विभिन्न स्थानमा असारे भाका गाउँदै, हिलो खेल्दै र सामूहिक रूपमा दही–चिउरा खाएर असार १५ को पर्व धुमधामका साथ मनाइएको छ ।
