गैँडाकोट । श्री नारायणी सामुदायिक वन उपभोक्ता समूह गैंडाकोट ६, ७ र ९ ले १३ औँ वार्षिक उत्सव एवंम उज्यालो टोल (बत्ती वितरण) कार्यक्रम गरेको छ ।
शुक्रबार संस्थाको उद्यान परिसरमा रहेको कार्यालयको सभाहलमा भएको कार्यक्रममा बोल्दै प्रमुख अतिथि गैँडाकोट वडा नम्बर ७ का वडाध्यक्ष होमनाथ सापकोटाले तन, मन र धन लगाएर काम गर्न सके सधैँ काममा सफल हुन सकिने बताउनुभयो । सापकोटाले सामाजिक काम गर्दा व्यक्तिगत स्वार्थ हेर्न नहुने र त्यसरी अगाडी बढ्न आवश्यक भएको बताउनुभयो ।
तेस्तै कार्यक्रममा गैँडाकोट वडा नम्बर ६ का वडाध्यक्ष शुभाष चापागाँइले जडिबुटी लगाउने र त्यसको संरक्षण र सम्बद्र्धनमा ध्यान दिने काम गर्नुपर्ने बताउनुभयो । योजना र कार्यान्वयनमा बिशेष ध्यान दिने सके सफल बन्न सकिने पनि उहाँले बताउनुभयो ।
तेस्तै जनप्रतिनिधि एंव गैँडाकोट वडा नम्बर ९ का कार्यवाहक वडाध्यक्ष ज्ञानप्रसाद खनालले वन सबैको जिवन र आवश्यकता भएको बताउनुभयो ।
कर्यक्रममा श्री नारायणी सामुदायिक वन उपभोक्ता समूहका संस्थापक अध्यक्ष खगराज सापकोटाले कंक्रिड रहित काठजन्य सामानहरुले भरिभराउ बनाएर अगाडी बढनुपर्ने बताउनुभयो । वन र वनका उत्पादन प्रयोग गर्दै आम्दानीको स्रोत बनाउन अनुरोध गर्नुभयो ।
वन समुहका अध्यक्ष नेत्रप्रसाद सापकोटाले वातावरण मैत्री उद्यान, सिमसार संरक्षणसँगै वन संरक्षणमा जुटिरहेको बताउनुभयो । नारायणी सामुदायिक वनले डाँडाहरुमा वृक्षरोपण, भू-क्षय न्यूनिकरण, वन अतिक्रमणको न्यूनिकरण, वन्यजन्तुको संरक्षण र जैविक बिबिधताको संरक्षण गर्दै आइरहेको उहाँले जानकारी दिनुभयो । उहाँले काठैकाठको सभाहल निर्माण गर्ने, भइरहेका कामलाई पूर्णता दिने लगायतका कामलाई निरन्तरता दिने बताउनुभयो । खर्चलाई सुन्यमा झार्ने अभियान सहित अगाडी बढ्ने बताउनुभयो ।
कार्यक्रममा सब डिभिजन वन कार्यालय गैँडाकोटका फरेष्टर दिनेश केसी, श्री हनुमान मन्दिर चक्रघाट समितिका अध्यक्ष टिकाराम सापकोटा, अभिनन्दित व्यक्तिहरु मनिभद्र कँडेल, पिसपार्क टोलका अध्यक्ष नाम कुमारी सापकोटा लगायतका अतिथिले वन संरक्षण आजको आवश्यकता भएको बताउँदै सबै एकजुट हुनुपर्ने बताएका छन् ।
श्री नारायणी सामुदायिक वन उपभोक्ता समूहका सचिव सिता गिरीले १२ टोल विकास संस्था र मठ मन्दिर लगायतलाई ७० पिस बत्ती वितरण गर्ने र आफैँ पोलमा राख्दिने पनि बताउनुभयो ।
कार्यक्रममा स्वागत मन्तव्य उपाध्यक्ष धनपति सापकोटाले व्यक्त गर्नुभएको थियो । सो अवसरमा वनको संरक्षण र विकासमा सहयोग पु¥याउने विभिन्न व्यक्तिलाई सम्मान गरिएको थियो ।
नारायणी वन ४ सय ६६.०२ हेक्टर क्षेत्रफलमा फैलिएकोे छ । वनमा ११ सय ५० बढि उपभोक्ता सदस्य रहेको समूहका कार्यालय सचिव हरिप्रसाद सापकोटाले जानकारी दिनुभयो ।
