कात्तिक २६, काठमाडौँ । नेपाल क्रिकेट सङ्घ (क्यान) का सचिव पारस खड्काले नेपाली क्रिकेट पारस खड्काको मात्र नभएको र पारसले चलाएको भन्ने भ्रमबाट मुक्त हुन सबैमा आग्रह गर्नुभएको छ ।
नेपाल प्रिमियर लिग (एनपीएल) बारे सोमबार क्यानद्वारा आयोजित अन्तरक्रिया कार्यक्रममा खड्काले आफुले २० वर्ष राष्ट्रिय टोलीबाट खेल्दा नेपाल र क्यानको झण्डा मुनि खेलेको र क्यानमा आएको एक वर्षमात्र भएको बताउनुभयो ।
‘‘एउटा पूर्व खेलाडी र अहिले पदाधिकारीको हिसावले नेपाली क्रिकेटलाई केही माथि लैजाऔँ भन्ने मात्र हो । पारस खड्का ब्यक्तिगत रुपमा केही होइन । एनपीएल पारसको मात्र नभएर सिङ्गो नेपाली क्रिकेट प्रेमीको हो । एनपीएलमार्फत क्यानले नेपालको क्रिकेटमा आर्थिक, सामजिक र ब्यावसायिक रुपान्तरण गर्न खोजेको छ । यसलाई भविष्यमा अझै उत्कृष्ट बनाउँदै लैजानेछौँ,’’ पारसले भन्नुभयो ।
भौतिक संरचना अभावका कारण नेपाली क्रिकेटले चाहेको जस्तो गर्न नसकेपनि एनपीएलको अर्को संस्करण ‘फ्लडलाइट’मा खेलाउने क्यानको इच्छा रहेको पारसले बताउनुभयो ।
‘‘एनपीएलको पहिलो संस्करणमै क्यानले सोचेभन्दा दोब्बर फ्रेन्चाइज टोली लगानी गर्न आए । जसमा आठ टोलीलाई स्थान दिन सफल भयौँ । फ्रेन्चाइज टोलीको लगानीले विस्तारै प्रतिफल दिनेछ । एनपीएलको पहिलो संस्करण आयोजनाले अन्तराष्ट्रियस्तरको ध्यान तानेको छ,’’ पारसले भन्नुभयो ।
एनपीएललाई सफल बनाउन क्यानले हरेक तवरमा पारदर्शिता अपनाएको पारसको भनाई थियो । मङ्सिर १५ देखि पुस ६ गतेसम्म त्रिवि मैदान कीर्तिपुरमा हुने एनपीएलमा आठ वटा फ्रेन्चाइज टोलीबिच प्रतिस्पर्धा हुनेछ ।
